Во изминатите десет дена се склучени неколку крупни јавни набавки, главно поврзани со градежни проекти, инфраструктура и јавни објекти, со вкупна вредност што надминува 20 милиони евра, покажуваат податоците од Електронскиот систем за јавни набавки.
На врвот на листата е договорот на Општина Аеродром со компанијата „Жикол“ ДООЕЛ Струмица за доградба на основното училиште „Блаже Конески“ (втора фаза) во вредност од 253,7 милиони денари или 4,13 милиони евра.
Следи проектот на Заводот и музеј – Струмица, кој со „Стентон Градба“ од Битола склучи договор од 2,67 милиони евра за довршување на Стариот театар во Струмица.
На третото место е повторно „Жикол“, овојпат со Општина Гази Баба, за изградба на нова детска градинка во населбата Маџари – Триангла, вредна 2,39 милиони евра.
Меѓу значајните договори се и:
- „Вардарградба“ од Трубарево за вакумска канализација во Јурумлери (2,35 милиони евра),
- „Ју-Бај 2“ ДООЕЛ Скопје за канализациони системи во Врапчиште (вкупно над 3,6 милиони евра во два договори),
- „Вардарградба“ повторно за водоснабдителен систем во Љубанци и Љуботен (1,72 милиони евра),
- и „Пирамид Билдинг Солушнс“ за реконструкција на мултифункционалниот центар во Аеродром (1,6 милиони евра).
Меѓу нефизичките услуги, најголема набавка е на Министерството за социјална политика, кое склучи договор со „Парти Сервис Лео“ за обезбедување готови оброци за народните кујни, вреден 1,46 милиони евра.
Списокот го затвора Општина Ѓорче Петров со проект од 1,33 милиони евра за новa детска градинка во населбата Дексион.
Во период на засилени инфраструктурни активности, градежниот сектор доминира со најголем дел од јавните договори. Ова ја потврдува тенденцијата на општините и државните институции да инвестираат во објекти од јавен интерес – училишта, градинки, канализациски и водоводни системи.
