По кратка пауза, легендарното партнерство помеѓу автомобилскиот бренд Jeep и италијанскиот фудбалски гигант Јувентус добива ново поглавје. Jeep ќе се врати како главен спонзор на “Старата дама” за сезоната 2025/2026, што значи дека препознатливото лого на брендот повторно ќе биде дел од дресовите на сите тимови на Јувентус – машкиот и женскиот сениорски тим, како и тимот на Juventus Next Gen.
Ова повеќегодишно спонзорство опфаќа и обезбедување официјални возила за клубот, како и заеднички промотивни активности кои ги поврзуваат двата моќни брендови. Соработката започна во 2012 година и низ дванаесет заеднички сезони донесе бројни трофеи и моменти на спортска слава за тимот од Торино.
Во текот на сезоната 2024/2025, Jeep учествуваше како официјален автомобилски партнер на клубот, но сега се враќа во полн капацитет како главен спонзор, продолжувајќи ја традицијата која ја симболизира победничкиот дух, иновацијата и меѓусебната посветеност на врвни резултати.
Со овој потег, Jeep дополнително ја зацврстува својата позиција на италијанскиот и европскиот пазар, додека Јувентус добива стабилен и силен партнер во својата мисија за враќање на врвот на италијанскиот и европскиот фудбал.
