Додека ги очекуваме сумираните бројки за продажбата на нови автомобили во Македонија за минатата година, по брендови, да се потсетиме кои биле најпродаваните брендови во Македонија во 2014 година.
Историските податоци од пред 10 години покажуваат дека продажбата на нови автомобили во Македонија се зголемила за 1,5% во однос на претходната, 2013 година. Така во текот на целата 2014 година биле продадени 4.217 нови моторни возила, вклучувајќи ги тука како патничките така и комерцијалните односно товарните.
Според истите податоци, најпродаван бренд бил Volkswagen со продадени 576 нови автомобили што претставува пазарен удел од 13,7%. Следи чешка Skoda со 397 продадени автомобили и пазарен удел од 9,4%, а трет најпродаван бренд бил Ford со продадени 337 нови автомобили. Најпродаваната петорка ја сочинуваат уште Opel со 296 продадени автомобили и Fiat со продадени 294 нови автомобили.
Во однос на продажбата по модели, најпродаван модел бил Volkswagen Golf со 192 продадени автомобили, а потоа следат Skoda Rapid (181) и Dacia Duster (140).
