Бугарскиот европратеник Андреј Ковачев, член на партијата ГЕРБ, предизвика бурни реакции со својата последна изјава на социјалните мрежи. Тој открива дека дури 216.000 граѓани од Северна Македонија поседуваат бугарски државјанства, што наводно е резултат на нивното бугарско потекло и самоопределување. Според Ковачев, многу од политичарите во Македонија не сакаат да разговараат за вклучување на Бугарите во Уставот, и покрај тоа што многу од нивните семејства веќе имаат бугарски пасоши.
„Не е лесно за колегите политичари од Македонија. Тие дури и не сакаат да слушнат за вклучување на Бугарите во Уставот, а половина од нивните семејства веќе имаат бугарско државјанство“, напиша Ковачев. Тој продолжува да објаснува дека бугарското државјанство е добиено со декларации за бугарски идентитет, во кои многу луѓе потврдуваат дека нивните роднини се Бугари.
Ковачев истакнува дека многу од оние кои ја критикуваат Бугарија и нејзината историја, всушност, кријат бугарски пасоши во џебовите. „На крајот на краиштата… за нив не е голем проблем дали ќе влезат во ЕУ. Тие веќе се внатре – заедно со уште 216.000 македонски граѓани“, додава тој.
Оваа изјава доаѓа во контекст на неодамнешната вест од бугарската „Нова ТВ“, која се занимава со одрекувањето на бугарските корени од страна на пратеникот Миле Лефков од ВМРО-ДПМНЕ. Според информациите, неговиот брат, Иван Лефков, добил бугарско државјанство пред две години, при што во своето барање навел дека целото негово семејство, вклучувајќи го и Миле, се Бугари. Оваа ситуација дополнително ја комплицира дебатата околу идентитетот и државјанството во регионот.
