Интервју со Зоран Краљевски, кандидат за советник во Општина Карпош од редовите на Коалицијата „Искуство за успех“.
1. Господине Краљевски, што Ве мотивираше да се кандидирате за советник?
ЗК: Мојата мотивација произлегува од желбата активно да придонесам за развојот на Карпош – општина која има потенцијал. Верувам дека со искрена работа, знаење и соработка со граѓаните може да се направи многу повеќе. Сакам да бидам дел од тим кој не ветува само на избори, туку реализира секојдневно.
2. Како го оценувате досегашното работење на градоначалникот Јакимовски?
ЗК: Сметам дека градоначалникот Јакимовски покажа стабилно, континуирано и одговорно управување со Општина Карпош. Во услови на ограничени ресурси и бројни предизвици, тој успеа да го зачува карактерот на Карпош како уредна, зелена и развиена општина. Посебно го ценам неговиот пристап да ги вклучи граѓаните во одлучувањето и да работи на реални, видливи проекти – не на празни ветувања.
3. Кои се клучните приоритети за кои ќе се залагате во наредните четири години?
ЗК: Поддршка на младите и семејствата преку продолжувањето во вложување во образованието, спортот и културата е моја примарна цел. Тука се и субвенциите за возачки дозволи кои изминатите години дадоа одлични резултати. Во наредните четири години ќе продолжи и субвенционирањето на високо енергетски фасади, лифтови, но и купување на електрични возила со што ќе се намали загадувањето на територијата на Општина Карпош. Унапредувањето на квалитетот на животот на граѓаните ми беше приоритет изминатите четири години, а ќе продолжи да биде и во наредните четири.
4. Кои се Вашите очекувања од овие избори?
ЗК: Очекувам граѓаните да направат избор базиран на резултати, не на празни зборови. Верувам дека мнозинството жители на Карпош ја препознаваат разликата меѓу политиканство и реална работа. Нашиот тим има јасна визија, искуство и докажана одговорност и сум уверен дека граѓаните тоа ќе го потврдат со својата доверба.
5. Која е вашата порака до карпошани во пресрет на изборите следната недела?
ЗК: Драги сограѓани, Карпош е наш заеднички дом. Да го чуваме, да го надградуваме и да не дозволиме да стане жртва на дневна политика. Ве повикувам да излезете и да гласате за стабилност, за искуство и за дела што се гледаат. За Карпош кој се развива со план, со ред и со одговорност.
