Шеесет и едногодишна жена од Куманово пријавила во полицијата дека е жртва на измама, откако загубила над 3,2 милиони денари, односно околу 50.000 евра, при обидот да купи стан со гаража. Според информациите, таа требала да се всели во новиот дом пред пет години, но неодамна открила дека станот е во сопственост на банка која е во стечај.
Пријавата е поднесена во СВР Куманово, каде жената изјавила дека преку посредник го купила станот од правно лице од Скопје. Според нејзините тврдења, рокот за изградба и примопредавање на станот бил поставен за септември 2020 година, но фирмата не го испочитувала.
На почетокот на 2025 година, таа добила известување од извршител дека доверител на купениот стан е банка во стечај, што ја натерало да сфати дека е измамена. Полицијата од Куманово веќе презема мерки за истражување на овој случај.
