По само неколку дена од објавувањето на кандидатурата на Амар Мециновиќ за градоначалник на Скопје, ВМРО-ДПМНЕ се соочи со реалноста дека освојувањето на главниот град нема да биде едноставен потфат. Наместо да се фокусираат на идеи и програма, партијата побрза да изнесе обвинувања дека Левица наводно склучила политички договор со СДСМ и ДУИ за да се обезбеди втор круг на изборите.
Од Левица реагираа на ваквите тврдења, истакнувајќи дека „ваквите конструкции се ништо друго освен израз на паника и признавање на сопствената слабост“. Тие нагласуваат дека пред изборите, Левица не се договара и не коалицира со ниту една партија, што е јасна и недвосмислена позиција. Според нив, ВМРО-ДПМНЕ е во незавидна ситуација и се обидува да се оправда пред своите гласачи, особено по објавените податоци за губиток од околу 150.000 гласа.
„Патетично претставуваниот ‘лав’ излезе дека е само мало маче, немоќно да се соочи со вистински политички предизвик“, додаваат од Левица. Тие веруваат дека токму Амар Мециновиќ ќе им покаже на граѓаните на Скопје колку е тенка нивната лага и колку лесно нивниот „лав“ може да се претвори во маче. Левица истакнува дека Амар ќе биде обединувачката сила која ќе ги сплоти сите чесни и слободоумни луѓе, кои се заситени од 30-годишните деструктивни и ограбувачки политики на ДПМНЕ, СДСМ, ДУИ и ВРЕДИ.
