Партијата Левица изрази сериозни обвинувања кон Биљал Касами, градоначалникот на Тетово, за наводно расипничко работење и криминал. Според нив, институциите под контрола на ДПМНЕ треба да се фокусираат на истражување на тендерите кои Касами ги доделил на компанијата „И-Поинт Маркетинг“, во сопственост на Менсур Аљити и Амир Алити. Вкупната вредност на овие тендери изнесува 114.000 евра.
Левица истакнува дека Менсур Аљити, косопственик на компанијата, е близок соработник на секретарот на Беса, Аднан Азизи, и дека во 2023 година донирал 3.000 евра на партијата на Касами. Овие информации, според Левица, укажуваат на потенцијални криминогени шеми, каде што пари од буџетот на Тетово завршуваат во приватни џебови на донаторите и активистите на Касами.
„Додека Тетово тоне во диви депонии и урбанистички хаос, коалициониот партнер на Мицкоски продолжува со истите практики како ДУИ. ДПМНЕ, и покрај своите изјави за борба против криминалот, всушност само ги заменува криминалците од ДУИ со криминалците од ВРЕДИ“, се вели во соопштението на Левица. Тие додаваат дека поддршката на Мицкоски за нов мандат на Касами потврдува дека овие партии продолжуваат со својата криминална матрица, злоупотребувајќи го мандатот добиен од народот за лична добивка.
