Сопствениците на Ливерпул одлучија да направат значаен потег на трансфер пазарот, одобрувајќи испраќање на рекордна понуда за напаѓачот на Њукасл, Александар Исак. Според информациите од „Сан“, клубот планира да понуди 130 милиони фунти, а понудата се очекува да биде испратена во текот на следната недела.
Претходната понуда од 110 милиони фунти беше одбиена од страна на „чавките“, но новата понуда би можела да го сруши досегашниот британски трансферен рекорд. Како што се наведува, официјалната понуда ќе биде поднесена по завршувањето на натпреварот помеѓу Њукасл и Ливерпул, кој е закажан за понеделник на „Сент Џејмсис Парк”.
Покрај тоа, Ливерпул планира да инвестира и во капитенот на Кристал Палас, Марк Геи, за кого се предвидени најмалку 35 милиони фунти. Со ова, мерсисајдците би можеле да потрошат вкупно 466 милиони фунти на нови играчи само ова лето. Иако клубот вложува значителни средства, тие исто така остварија приходи од продажба на играчи над 200 милиони фунти, а се очекува дека ќе има и дополнителни трансфери на играчи од клубот.
