Франкфурт, 26 мај 2025 (МИА) – Најголемата европска авиокомпанија Луфтханза денеска соопшти дека го продолжува прекинот на летовите за Тел Авив до 15 јуни, поради засилената израелска офанзива во Појасот Газа.
– Поради моменталната ситуација, групацијата Луфтханза ги прекинува своите летови до и од Тел Авив до недела, 15 јуни, заклучно со тој ден, се наведува во соопштението на германската групација, наместо до 8 јуни како што беше претходно најавено.
И покрај зголемениот меѓународен притисок, Израел ја интензивира својата офанзива во Газа, со цел уништување на Хамас, ослободување на преостанатите заложници и преземање контрола над Појасот Газа.
Во денешните израелски воздушни напади во Газа загинаа најмалку 52 лица, според податоците на палестинската цивилна заштита.
Групацијата Луфтханза, која исто така ги опфаќа Свис (Swiss), Аустриан ерлајнс (Austrian Airlines), Брисел ерлајнс (Brussels), а сега и ИТА ерлајнс, направи неколку измени во својот распоред на летови од почетокот на војната во Појасот Газа, како и други авиокомпании.
Од Јасмина Тасевска Извор МИА
