Иако летото календарски уште трае, а рака на срце и високите температури сеуште се тука, сепак, туристите како полека да завршуваат со летните одмори и се насочуваат кон работните обврски. За оние пак кои и не толку уживаат во морето и песочните плажи, со нетрпение ќе очекуваат да заминат на прошетка во некоја од европските метрополи. Додека, постојат и такви коишто сакаат да направат комбинација од море, шопинг, шетање, уживање. Токму за нив, денешната прошетка ќе биде вистински предизвик за уживање низ долгите, шарени и “распеани” улици во еден од најубавите градови во Европа, којшто го нарекоа “Фантазија на Скандинавија” – Копенхаген.
Зошто баш Копенхаген?
Самите епитети кои му се дадени на градот, кажува за неговата важност, убавина, шармантност: Фантазија на Скандинавија, Северна Венеција, Северен Истанбул, историски музеј на Европа и сл. Се претпоставува дека овде живеат најсреќните луѓе, кои и тоа како има со што да се гордеат. Уште при првото пристигнување, ќе наидете на раскошна архитектура, дворци, палати, фасади со живи бои и ред други знаменитости кои се инспирација за многу бајки…Шармантниот Копенхаген кој во превод би значел трговско пристаниште или место за трговија.
Што треба да видите во Копенхаген?
Се ! Целиот град изобилува со воздишки, почнувајќи од Tivoli Gardens најпознатиот забавен парк во Европа, новото пристаниште – Niheven кој е еден вид обележје на градот, дворецот Rosenborg, Кралската палата Amalienborg, Christianborg Palace односно палатата каде се наоѓа Данскиот парламент, Операта што се наоѓа на самиот морски брег, фамозната црква Church of Our Saviour која е позната по својот спирален облик и кружните скалила по кои можете да стигнете до самиот врв, кружната кула во центарот на градот, “Малата сирена” со која фотографирањето е “задолжително”, пешачката зона која е една од најстарите на светот…
Сепак потребно е да се знае дека неодамна Копенхаген се најде на листата на најскапи градови во Европа. Овде еден ручек за двајца во ресторан просечно би изнесувал околу 107 евра. Кога сме веќе кај рестораните, а што е интересно за нас, тоа е дека токму овде се наоѓа еден од најелтните ресторани Noma кој три години по ред (2010, 2011, 2012) беше прогласен за најдобар ресторан во светот, а верувале или не тој е во сопственост на Рене Реџепи кој е дански државјанин со македонско потекло. Најтопло ви препорачуваме да не заминете без да ги вкусите добро познатите дански пива tuborg и karlsberg кои ќе ги најдете во бројните пивници, уживајќи истовремено и во мелодијата на данската музика. Доколку не сте љубители на пивото, одморете со преубаво капучино и некои од познатите “дански пецива” или сендвичите со многу креативни слоеви. Копенхаген има премногу кафулиња кои се идеално место за да земете здив од долготрајните прошетки. Доколку сакате да ви помогнеме при изборот на кафуле каде што истовремено ќе уживате и во вкусот на кафето и во погледот, ви го предлагаме Original coffe којшто се наоѓа во “срцето” на градот. Градот не е голем, така што секаде можете да се движите пешки, а доколку мислите дека тоа нема да можете да го постигнете, изнајмете велосипед од кое било место во градот. Плаќањето се врши исклучиво со картичка, така што трчањето по менувачници нема да биде потребно.
И доколку мислите дека сето ова ви е малку, “тркнете” на еден ден до Малме, којшто е оддалечен на само половина час возење. Малме е еден од најразвиените центри на Шведска и е трет по населеност. Овие два града а истовремено и двете држави Данска и Шведска се поврзани со Ересундскиот мост којшто е долг 25км, комбинација од мост и тунел а истовремено претставува и еден од најдолгите во светот. Повратна карта со воз би ве чинело околу 20 евра.
За крај, не заборавајте да си резервирате карта навреме. За само два часа и дваесет минути авионски лет и веќе сте таму. На враќање понесете некои од сувенирите кои ги има во изобилие. И нормално, кога и да решите да го посетите Копенхаген, убаво ќе си поминете !
ФОТОГАЛЕРИЈА
▶ Случајно видео
