Репрезентацијата на Македонија до 21 година загуби од Италија во натпреварот од вториот круг во квалификациите за Европското првенство.
По поразот во Полска, избраниците на Горан Станиќ загубија во Битола од фаворизираната Италија со 0:1.
Натпреварот на „Петар Милошевски“ го следеа околу 8.000 гледачи, но радоста им припадна на гостите, иако повеќе од едно полувреме играа со играч помалку.
Италијанците поведоа во 35. минута преку Лука Марианучи, кој по една мешаница во нашиот шеснаесетник остана сам на втората статива и прецизно погоди во мрежата на Василев.
Македонија по влегувањето во игра на Дашмир Елези и Мартин Ѓорѓиевски ја презеде иницијативата, имаше неколку обиди преку Хамза, Николовски и Гаштаров, но без реализација.
Во 55. минута нашите фудбалери бараа пенал по игра со рака на Идризи, но судијата не досуди најстрога казна.
И покрај бројната предност и поддршката од трибините, младите „црвено-жолти“ не успеаја да стигнат до израмнување и останаа без бодови против силната Италија.
Македонија – Италија 0:1 (0:1)
Стадион: „Петар Милошевски“ – Битола
Гледачи: 8.000
Стрелец: Марианучи 35’ (И)
Македонија: Василев, Даилоски (Елмас 84’), Мелиќи, Џеков, Меметриза, Ангелов (Ѓоргиевски 69’), Зенделовски (Елези 46’), Гаштаров, Данев, Трајков, Николовски.
Италија: Мота, Моруци, Чиародиа, Марианучи, Палестра, Ндоур, Липани, Писили (Дагасо 83’), Колеошо (Перуини 76’), Раимондо, Пафунди (Идризи 29’).
Извор/Фото:www.ffm.mk
