Македонската дијаспора во Канада деновиве е во празнично расположение. Нешто помалку од една недела ја дели заедницата од пристигнувањето на познатиот македонски фолк изведувач Јордан Митев, кој заедно со својот оркестар доаѓа директно од Македонија за серија концерти во Торонто и Виндзор.
Настапите се најавуваат како вистински музички спектакл, со препознатливи народни и новокомпонирани хитови, жива атмосфера и вечер исполнета со песна, игра и носталгија по татковината. Организаторите очекуваат голема посетеност, со гости од повеќе канадски градови, но и посетители од САД.
Првиот концерт ќе се одржи на 13 февруари, а вториот на 15 февруари, во големата сала на МПЦО „Свети Климент Охридски“ – Торонто на булеварот Overlea Blvd во Торонто.
На 14 февруари, караванот се сели во Виндзор, каде Митев ќе настапи во МПЦО „Свети Никола“ – Виндзор, пред публиката од југозападниот дел на Онтарио.
Сите концерти започнуваат во 19:00 часот, а интересот за билети, според организаторите, е голем уште од првите најави.
За многумина иселеници, ваквите културни настани претставуваат повеќе од обичен концерт. Тие се начин за одржување на јазикот, традицијата и чувството на припадност.
„Ова е можност да се собереме, да запееме македонска песна и да се почувствуваме како дома“, велат членови на заедницата.
Јордан Митев, познат по својата енергија на сцена и контактот со публиката, ги покани сите Македонци, нивните пријатели и љубители на балканската музика да бидат дел од вечерите исполнети со добра забава и емоции.
За повеќе информации и резервации на карти, заинтересираните можат да се јават на: 647-906-4058.
Со три вечери фолк музика, песна и дружење, македонската заедница во Канада повторно покажува дека традицијата живее – без разлика на километри и континенти.
