Во германската сојузна држава Хесен на 15 март 2026 година ќе се одржат локални избори, на кои меѓу кандидатите се наоѓа и Македонецот Ванчо Воденски, кој се кандидира за член на советот на општина Mühlheim am Main.
Воденски е кандидат на листата на ЦДУ (Христијанско-демократска унија на Германија), една од најголемите политички партии во Германија.
Македонец од Беровско во германската политика
Ванчо Воденски е роден на 27 март 1973 година во селото Русиново, Берово. Неговите родители го однеле во Германија кога имал само една година, и оттогаш речиси целиот живот го поминал во оваа земја.
Тој е татко на две деца – Мелани и Кристијан.
По образование е водоинсталатер и техничар за системи за греење, а денес води сопствена фирма за водоводни и грејни инсталации, поради што во локалната заедница е познат под името „Vodenski Installateur Heizungsbau“.
Во политиката активно се вклучил во 2020 година, кога станал член на ЦДУ.
Избори во општина со околу 13.000 жители
На локалните избори во Мулхајм на Мајна се избира совет кој брои 45 членови, а општината има околу 13.000 жители.
Право на глас на овие избори имаат сите граѓани кои имаат германско или европско државјанство и живеалиште во Мулхајм на Мајна.
Повик до македонската дијаспора
Од Светски Македонски Конгрес упатија повик до Македонците кои живеат во Мулхајм на Мајна и имаат германско или европско државјанство масовно да излезат на изборите на 15 март и да го поддржат кандидатот Ванчо Воденски.
Според организацијата, учеството на Македонците во локалната политика во европските земји е важно за поголема видливост на дијаспората и зајакнување на заедницата.
Македонци во политиката во Европа
Кандидатурата на Воденски е уште еден пример за активното вклучување на македонската дијаспора во политичкиот живот на европските земји, каде што живеат и работат илјадници Македонци.
Локалните избори во Германија често претставуваат прв чекор за политичка кариера, а заедниците на иселеници преку нив добиваат можност да бидат подобро претставени во локалната власт.
