Политичката партија Македонски Концепт денеска го поздрави, како што го оцени, „историскиот чекор“ на Полска и Чешка, кои со законска регулатива ја изедначија комунистичката пропаганда со нацистичката, предвидувајќи затворски казни за нејзино промовирање и финансирање.
Од партијата сметаат дека ваквото законско решение претставува европски стандард и патоказ за целосна интеграција во Европската Унија, посочувајќи дека сличен модел треба да биде применет и во Македонија.
Според Македонски Концепт, првиот чекор треба да биде усвојување на резолуција во Собранието, со која државата јасно би се определила за следење на примерот на Полска и Чешка. Како следна фаза, партијата предлага донесување закон со кој, според нив, би се затворила „правната празнина што овозможува глорификација на тоталитарен режим“.
Во соопштението се наведува дека комунистичкиот режим извршувал систематски репресии, ликвидации без судски пресуди и прогон на лица кои тие ги нарекуваат „македонски патриоти“, и дека, за разлика од европските држави кои се соочуваат со своето минато, во Македонија сè уште постојат обиди за негова рехабилитација и политичка злоупотреба.
Од партијата ги истакнаа и своите конкретни барања, меѓу кои се:
- криминализација и забрана на јавна употреба на комунистички симболи, говори и собири кои, според нив, поттикнуваат омраза или укинување на основни човекови права;
- забрана за финансирање на движења и политички субјекти кои промовираат тоталитарни идеи;
- официјално признавање на, како што наведуваат, криминалите на комунистичкиот режим во Македонија, како основа за историска правда и институционална заштита на идните генерации.
Македонски Концепт ги отфрли обвинувањата од левичарските структури дека ваквите иницијативи претставуваат напад врз демократијата, оценувајќи дека, напротив, демократските вредности се заштитуваат преку јасно разграничување од идеологиите кои, како што велат, вршеле репресија врз сопствените граѓани.
„Македонија не може да биде целосно функционална европска демократија без јасно соочување со тоталитарното минато“, порачуваат од партијата, додавајќи дека нивната визија е „европска Македонија ослободена од идеолошки наследства кои ја ограничувале слободната мисла“.
