„Матица македонска“ го издаде преводот на македонски јазик на книгата „Македонија не е Грција“, авторство на Ердоѓан Ознал — турски генерал и истражувач на балканските прашања. Ова капитално дело првпат беше објавено во Анкара во 1993 година и предизвика силна реакција во грчката јавност. Книгата ја отфрла грчката теза дека Македонија е дел од Грција и нагласува дека македонскиот народ е посебен, со своја историска, етничка и јазична посебност.
Авторот, генерал Ознал, користи богата документација од османлиските и турските воени архиви, кои ја прикажуваат вистинската слика за македонската историја и култура. Тој нагласува дека Македонија никогаш не била грчка, и дека македонскиот народ секогаш постоел како посебна заедница.
На симпозиум во Грција во 1993 година, Ознал се спротивстави на грчките тврдења дека „Македонија е Грција“, што предизвика молк во салата и ја инспирираше оваа книга.
Во книгата се презентирани и податоци за демографијата на Македонија од 19 и почетокот на 20 век, прикажани преку османлиските архиви, како и информации за жестоката асимилаторска политика на Грција кон Македонците. Ознал го посочува и геноцидот врз македонското население во периодот 1913-1918 година, кога голем број Македонци биле присилно протерани од Егејска Македонија.
Авторот исто така го поврзува историскиот однос на Грција кон Македонија со актуелните проблеми по нејзиното осамостојување и ја нагласува важноста од признавање на македонскиот национален идентитет.
Книгата предизвика силни реакции во Грција, а и покрај тоа што ставовите не се официјална политика на Турција, факт е што била печатена во печатницата на турскиот Генералштаб, што ѝ дава полуофицијален карактер.
Инаку, Ердоѓан Ознал има македонско потекло — неговиот татко е роден во Дојран, а тој во 2017 година ја посети Македонија и ги посети местата за кои слушал од својот татко.
Во текот на овој месец, „Матица македонска“ организира акција со попуст од 50% на книги поврзани со македонскиот национален идентитет. До крајот на август, ќе бидат објавени и нови изданија за важни прашања од македонската историја и сегашност, а „Македонија не е Грција“ е дел од тие изданија.
