Претседателот на ФК Милан, Паоло Скарони, најави дека до 2031 година, Интер и Милан ќе добијат нов стадион кој ќе биде прогласен за најдобар во Европа. Оваа информација беше објавена од италијанските медиуми, а Скарони истакна дека проектот за новиот стадион во населбата Сан Сиро се развива веќе подолго време, со значителни вложувања. „На проектот за новиот стадион во градската населба Сан Сиро се работи долго време, вложени се многу средства и со сигурност ќе го оствариме замислениот цел. Милан и Интер ќе добијат најдобар стадион во Европа, на кој ќе бидат горди сите граѓани на Милано,“ изјави Скарони, кој во својата кариера беше на чело на познатите италијански енергетски компании Енел и Ени.
Дизајнот на стадионот е изработен од компанијата „Популус“ и е дел од поширокиот план за ревитализација на важна урбана зона во Милано, која ќе биде посветена на спортот и забавата. Општина Милано планира да ја преуреди околината на Сан Сиро во зона исклучиво за пешаци, со околу 110 илјади квадратни метри зелени површини, што претставува 40 проценти од вкупната површина. Планирано е паркингот, кој моментално зафаќа 40% од просторот, да биде преместен во подземен простор.
Повеќето спортски и рекреативни содржини, внатрешни и надворешни, ќе бидат достапни бесплатно или со субвенции од градот. Оваа недела, ресорната комисија на Градскиот совет на Милано даде одобрение за купување на земјиштето на кое се наоѓа стадионот „Џузепе Меаца“. За ова земјиште, кое вклучува и околниот простор, Интер и AC Милан ќе треба да платат 197 милиони евра. Проектот за новиот стадион има поддршка од градоначалникот на Милано, Џузепе Сале, а целокупната процедура во Градскиот совет треба да биде завршена до крајот на септември.
