Основното јавно обвинителство во Скопје започна постапка против 53-годишен маж, осомничен за кривично дело насилство врз дете, согласно член 201а од Кривичниот законик. Инцидентот се случил на 11 ноември, кога осомничениот агресивно нападнал 12-годишно дете кое се движело со велосипед по булеварот “Крсте Мисирков”.
Според информациите, мажот, возејќи електричен мотор, без никаков повод и причина, го пресретнал детето и започнал да го удри со тупаници и клоци во лицето и телото. Во еден момент, тој извадил нож и замавнал кон детето, а потоа го удрил со дршката од ножот по главата. Дете успеало да се оттргне и да побара помош од случајни минувачи.
По нападот, осомничениот го зел велосипедот на детето, му ги исекол двете гуми и го фрлил на улицата, со намера да предизвика дополнителна штета на возилата што поминувале. Потоа, тој го напуштил местото на настанот со својот мотор, додека детето било пренесено во Ургентниот центар за медицинска помош.
Јавниот обвинител поднесе предлог до судијата на претходна постапка од Основниот кривичен суд Скопје за определување мерка притвор за осомничениот, поради постоење на околности кои укажуваат на опасност од бегство.
