Москва, 8 мај 2025 (МИА) – Официјални лица во Москва изјавија дека иако руската влада официјално започна 72-часовен прекин на огнот за Денот на победата на полноќ по московско време, украинските сили започнаа напади со дронови врз неколку региони.
Иако предлогот за прекин на огнот беше поднесен кон крајот на април, украинскиот претседател Володимир Зеленски „јавно го отфрли на 3 мај“, објавија руските медиуми.
Руските вооружени сили предупредија дека ќе го задржат правото да одговорат во случај на кршење на договорот од страна на Украина.
-Руската воздушна одбрана го одби нападот, а девет дронови беа уништени над Москва, изјави градоначалникот на Москва, Сергеј Собјанин.
Ова е трет пат Русија еднострано да прогласи прекин на огнот за време на конфликтот во Украина. Претходните два пати – за време на Божиќ 2023 и Велигден 2024 година – прекинот на огнот беше прекршен од Киев, тврди Кремљ, кој ги окарактеризира постапките на украинската страна во тоа време како „цинични и необјасниви“.
Руската влада соопшти дека прекинот на огнот ќе трае до полноќ на 11 мај.
Од Марија Спасовска Извор МИА
