Министерот за надворешни работи, Тимчо Муцунски, реагираше на изјавите на Венко Филипче, лидерот на СДСМ, кој тврди дека преговорите со Европската унија се блокирани. Според Муцунски, реалноста е поинаква: “благодарение на СДС и ДУИ, тие преговори не можат да бидат блокирани, затоа што никогаш и не започнаа”.
Муцунски нагласи дека неговата партија не се занимава со празни зборови, туку со конкретни резултати. “Од нас нема да слушнете големи зборови без покритие и празни чекори во сегашноста. Нашата задача не е да нудиме изговори, туку резултати. Затоа ја движиме државата напред – таму каде што ѝ припаѓа: во Европа”. Тој истакна дека реализацијата на проекти како бесплатен роаминг за граѓаните, зелени ленти за превозниците и партнерство со ЕУ во безбедноста се вистински реформи.
“Венко е во право: зборувам и работам и за поевтин роаминг за македонските граѓани. Но зборувам и за зачуван идентитет, достоинство и гордост. И да, не зборувам за виткање кичма, за администратори, за договори под маса, за прифаќање уцени или ултиматуми, како што тие го правеа тоа”, додаде Муцунски.
Тој повика опозицијата да дејствува рационално и разумно, со цел да не штети на европскиот процес, туку да помогне преку реформите во земјата. “Ова не е борба за лични или партиски интереси. Ова е борба за граѓаните, за државата, за иднината. И ќе напредуваме само ако сите заедно ги ставиме државните пред партиските интереси”, заклучи Муцунски.
