Жозе Мурињо е во игра за можната замена на Нуно Еспирито Санто на позицијата менаџер на Нотингем Форест. Иако Еспирито Санто имаше успешна сезона со тимот, неговата иднина е под знак прашалник поради лошите односи со сопственикот на клубот, Евангелос Маринакис. Поранешниот тренер на Вулверхемптон и Тотенхем призна дека постојат несогласувања помеѓу него и управата.
Иако од Нотингем официјално не потврдуваат дека ќе се разделат со Еспирито Санто, ситуацијата е нестабилна и не би било изненадување ако дојде до промена. Според извори од „Сан“, Мурињо е едно од главните имиња кои се разгледуваат за нов менаџер. Друга опција е Анге Постекоглу, кој беше отпуштен од Тотенхем по завршувањето на минатата сезона. На списокот на потенцијални кандидати се наоѓа и Брендан Роџерс, актуелниот менаџер на Селтик.
Се очекува Еспирито Санто да го предводи Нотингем во недела против Кристал Палас, но неговата иднина во клубот останува неизвесна. Според англиските медиуми, проблемите не се само со сопственикот, туку и со спортскиот директор Еду, со кого има разлики во однос на селекцијата на играчи.
