Жестока политичка пресметка меѓу премиерот и лидер на ВМРО-ДПМНЕ, Христијан Мицкоски, и градоначалничката на Скопје, Данела Арсовска, предизвика лавина реакции на социјалните мрежи.
Мицкоски, одговарајќи на новинарско прашање за натрупаното ѓубре во главниот град, изјави дека „десет пати се извинил што ја поддржал кандидатурата на Арсовска во 2021 година“ и дека таа грешка „никогаш нема да ја повтори“.
Нејзиниот одговор не доцнеше. „Им се извинувам на граѓаните што сум мислела дека си чесен, професор и интелектуалец, не знаејќи што навистина си,“ напиша Арсовска на својот фејсбук профил, обраќајќи се директно до премиерот.
Во продолжение, таа го обвини за блокада на сите проекти на Градот:
„Мицкоски, несреќо, јас завршувам со борбата во која твојот претседател на Советот на Град Скопје и твоите советници четири години го блокираа и урнисаа градот. Не гласаа за нови автобуси, не гласаа за бесплатен превоз, не дозволија да се набави нова механизација за чистење на ѓубрето, ни за нови пожарникари и противпожарни возила.“
На тврдењето на Мицкоски дека „ќе има одговорност со име и презиме“ за состојбата со затрупаното ѓубре, Арсовска возврати дека токму советниците на ВМРО-ДПМНЕ се директно виновни: „Ако сакаше да има одговорност, требаше твоите советници да дадат оставка, за да сега ти заедно со нив не си директно одговорен за хаосот во Скопје.“
Пресметката меѓу премиерот и градоначалничката ја отвори уште еднаш темата за хаотичната состојба со комуналната хигиена во главниот град и политичката блокада што трае цел мандат.
