НЛБ Банка од 23 јуни 2025 година ќе ги укине таксите за физички лица за приклучок на интернет банкарство, вклучително и право на трансакции со токен од 750 денари. Сепак, за увид во состојбата на сметка преку МКЛИК ќе се наплаќаат 20 денари месечно за одредени пакети.
Според новиот предлог Тарифник, кој ќе започне да важи по два месеца, ќе биде задолжителен надоместок од 45 денари месечно за одржување на сметка, под услов на сметката да има повеќе од 100 денари.
За повлекување готовина од платежна сметка преку банкарските шалтери, таксата ќе се движи од минимум 100 денари до максимум 500 денари, додека за пензионери и корисници на социјална помош, минималната такса ќе изнесува 60 денари, а максималната 500 денари.
Доколку клиентите се соочат со потреба од деблокада на сметка, ќе треба да платат такса од 500 денари. За уплата на средства на сметки во НЛБ Банка, таксата ќе изнесува 60 денари за уплати до 10.000 денари, а за уплата на режиски трошоци за правни лица со кои Банката има склучено посебен договор, провизијата ќе изнесува 120 денари.
“Ве информираме дека Банката изврши измени и дополнувања во Општите услови за отворање и одржување на платежни сметки и за вршење други платежни услуги за физички и правни лица, како и во Одлуката за Тарифата на надоместоци, кои ќе се применуваат од 23 јуни 2025 година”, стои во соопштението кое добиле клиентите на НЛБ Банка.
Од НЛБ Банка додаваат дека, согласно Законот за платежни услуги и платни системи и Рамковниот договор, ако клиентот не ја извести Банката за несогласност со измените пред примената на новите услови, се смета дека ги прифаќа новите услови.
