Газа, 23 април 2025 (МИА) – Појасот Газа „веројатно се соочува со најлошата хуманитарна криза“ откако почна војната меѓу Израел и палестинското исламистичко движење Хамас пред повеќе од година и пол, според Обединетите нации.
Помошта за цивилното население е отежната од новите израелски воени напади, блокадата на испораките на хуманитарна помош која трае повеќе од 50 дена, смртоносните напади врз волонтери и масовните ограничувања на движењето во крајбрежниот појас, се вели во извештајот објавен денеска од Канцеларијата на ОН за координација на хуманитарни прашања (ОЦХА).
Речиси сите 43 меѓународни и палестински хуманитарни организации во анкета наведоа дека „морале да ги суспендираат или драстично да ги намалат услугите“ од обновувањето на израелските напади на 18 март.
Бројот на жители на Газа кои повторно биле раселени оттогаш последно беше проценет од ОН на околу половина милион.
Хуманитарната организација Оксфам соопшти дека речиси и да нема чиста вода за пиење, бидејќи објектите биле бомбардирани или престанале да работат откако биле прекинати последните функционални далноводи кои се користеле за работа на санитарните објекти. Во меѓувреме, храната е оскудна, а цените премногу се зголемиле.
Израел го обвинува Хамас дека насилно присвојува резерви за помош и ги продава на цивилното население по надуени цени, пренесе ДПА.
Според Оксфам, генераторите за струја за итни случаи ретко работат поради исцрпени резерви на гориво.
Во меѓувреме, во израелската влада продолжува дебатата за тоа дали да се интензивираат нападите врз Газа или да се чекаат резултатите од индиректните мировни преговори со Хамас.
На синоќешниот состанок на безбедносниот кабинет на израелскиот премиер Бенјамин Нетанјаху, крајнодесничарскиот министер за финансии Безалел Смотрич и други министри повикаа на голема копнена офанзива за целосно уништување на Хамас, јавија израелските медиуми.
Меѓутоа, телевизијата Кан, цитирајќи висок владин претставник, јави дека Израел сака да им даде уште една шанса на индиректните преговори со Хамас за ново примирје.
Последната фаза на примирје заврши пред еден месец. Потоа израелските вооружени сили ги продолжија нападите во Појасот Газа.
Израел вели дека 24 заложници сè уште се држат во Газа, како и телата на 35 лица киднапирани од терористите на Хамас за време на нападот на 7 октомври 2023 година. Околу 1.200 луѓе беа убиени во израелските заедници, а повеќе од 250 Израелци беа земени како заложници.
Според здравствените власти на Појасот Газа, кои се под контрола на Хамас, оттогаш се убиени повеќе од 51.200 луѓе. Во бројките не се прави разлика меѓу цивилни и воени жртви.
Од Јасмина Тасевска Извор МИА
