Познати се сите двојки за плејофот во Лигата на Европа (ЛЕ). Во четвртокот беа одиграни 11 реванш-дуели од третото коло од квалификациите, при што единствено Риека успеа во вторникот да го надомести дефицитот од првиот меч и да го елиминира Шелбурн. Во четвртокот за плејофот се пласираа КуПС (Финска), Митјиланд (Данска), Бран (Норвешка), Линколн Ред Импс (Гибралтар), ПАОК (Грција), Зрињски (БиХ), ФЦСБ (Романија), Макаби Тел Авив (Израел), Утрехт (Холандија), Брага (Португалија), АЕК Ларнака (Кипар) и Панатинаикос (Грција).
Натпреварот меѓу Шахтјор и Панатинаикос заврши без голови во двата меча, па победникот беше одлучен по пенали, каде грчкиот тим имаше повеќе среќа. Пласман во плејофот обезбедија и македонскиот претставник Шкендија, како и Динамо Киев, Лудогорец, Слован Братислава, Малме и Лех Познањ, кои претходно беа елиминирани од Лигата на шампионите. Дополнително, во плејофот се вклучија и третопласираните тимови од националните лиги – Генк, Јанг Бојс, Самсунспор – како и освојувачите на националните купови Абердин и Сигма.
Сите двојки за плејофот се: Макаби Тел Авив (Израел) – Динамо Киев (Украина), Шкендија (Македонија) – Лудогорец (Бугарија), Слован Братислава (Словачка) – Јанг Бојс (Швајцарија), Малме (Шведска) – Сигма Оломоуц (Чешка), Панатинаикос (Грција) – Самсунспор (Турција), Абердин (Шкотска) – ФЦСБ (Романија), Лех Познањ (Полска) – Генк (Белгија), Митјиланд (Данска) – КуПС (Финска), Линколн Ред Импс (Гибралтар) – Брага (Португалија), Зрињски (БиХ) – Утрехт (Холандија), Бран (Норвешка) – АЕК Ларнака (Кипар) и Риека (Хрватска) – ПАОК (Грција). Првите натпревари ќе се играат на 21 август, а реваншите една недела подоцна.
