Министерството за здравство побара вонреден инспекциски надзор во Општата болница во Кавадарци и на Детската клиника во Скопје, по трагичната смрт на тригодишно дете од Кавадарци. Информацијата ја потврди заменик-министерот за здравство, Јовица Андовски, за МИА.
Од Државниот санитарен и здравствен инспекторат информираа дека надзорот ќе се спроведе во текот на утрешниот ден.
Родителите на детето повикуваат надлежните институции да испитаат дали имало лекарска негрижа или грешка. Таткото, Тони Стојанов, во изјава за МИА, опиша како утрото околу 02:40 часот неговата сопруга го разбудила со детето во рацете, кое било во критична состојба.
„Побаравме итна лекарска помош во Кавадарци, но чувствуваме дека состојбата не беше третирана со сериозност. Сакаме независна комисија што ќе ја утврди вистината – нашето дете ни почина во рацете,“ рече тој.
Според податоците на полицијата, мајката на детето, Т.Ѓ.С. (36), го однела синот во кавадаречката болница околу 3 часот наутро. Оттаму биле препратени кон Клиниката за детски болести во Скопје, каде што околу 8:45 часот била констатирана смрт.
Истражните и инспекциските постапки се во тек, а јавноста очекува одговори за трагедијата што ја потресе јавноста.
