Полициски службеник од Одделението за криминалистички работи Гази Баба е лишен од слобода поради сомнение за сторено кривично дело „изнуда“, информираат од Министерството за внатрешни работи. Против него е поднесена кривична пријава, а ќе следува и суспензија од работното место.
Како што соопштува МВР, постапката е покрената по пријава од граѓанин кој навел дека полицискиот службеник Х.З. (48), заедно со други лица, во повеќе наврати од него барал 20.000 евра. Парите, наводно, биле поврзани со долг што синот на пријавителот го имал кон трето лице.
По пријавата, Одделот за внатрешна контрола, криминалистички истраги и професионални стандарди презел мерки за расчистување на случајот, при што биле обележани и криминалистички обработени паричните средства. На 25 декември 2025 година, на подрачјето на Центар, непосредно по примопредавањето на парите, Х.З. бил уапсен, а при претрес кај него биле пронајдени 20 банкноти од по 50 евра.
Осомничениот е задржан во полициска станица, а Одделението за насилен криминал при СВР Скопје до Основното јавно обвинителство Скопје поднесе кривична пријава против него по член 258 од Кривичниот законик – „изнуда“.
Од МВР најавуваат дека Одделот за внатрешна контрола ќе поднесе и предлог за поведување дисциплинска постапка, при што ќе биде изречена задолжителна мерка – отстранување од работното место до завршување на постапката. Во меѓувреме, судија на претходна постапка му определил мерки на претпазливост.
