Средствата целосно ќе бидат наменети за Фондацијата Ferrari и нејзините образовни програми. Автомобилот е уникатен по тоа што половина од каросеријата е обоена во жолтата нијанса Giallo Modena, а другата половина е изработена од откриен карбон.
Ова е 600-тиот и последен примерок од серијата Daytona SP3, кој постави нов рекорд на аукција за современ Ferrari. На настанот Monterey Car Week беше продаден за неверојатни 26 милиони долари – сума која е повеќе од петпати повисока од пазарната вредност на моделот. Сепак, станува збор за донација, бидејќи сите пари се насочени кон добротворни цели.
Аукцијата ја организираше RM Sotheby’s во партнерство со Ferrari, а средствата одат за проектите на фондацијата. Еден од поновите примери е реконструкцијата на Aveson Charter School во Калифорнија, уништена од пожарот Eaton Wildfire.
Иако технички автомобилот беше продаден за 26 милиони долари, вистинската слика е дека новиот сопственик направи донација од таа сума, а за возврат доби уникатен Ferrari и значително даночно олеснување.
Што се однесува до спецификациите, возилото користи стандардниот 6.5-литарски V12 мотор со природна аспирација, кој испорачува 828 коњски сили и 697 Nm вртежен момент. Моќта се пренесува кон задните тркала преку седумбрзинска трансмисија со двојна спојка. Внатрешноста е исто така специјално изработена, со елементи од рециклирани гуми и карбонски влакна какви што Ferrari користи во Формула 1.
