Светскиот Македонски Конгрес испрати јавен повик за семакедонско помирување и обединување, повикувајќи ги сите Македонци – независно од потекло, вера, политичка определба или место на живеење – да застанат во одбрана на името на државата и идентитетот на нацијата.
„Само Македонија е нашиот заеднички именител. Со Македонија не’ има – без неа сите заедно ќе не’ снема“, се вели во соопштението.
Конгресот повикува на солидарност, соработка и љубов, промовирајќи го македонскиот идентитет како темел на мир, толеранција и културна коегзистенција. Апелот е упатен до сите Македонци во земјата и дијаспората да го стават единството над поделбите.
„Не прашувај што татковината сторила за тебе, прашај се што правиш ти за Македонија“, е дел од емотивната порака, со повик за лична одговорност и секојдневно делување во полза на државата.
Повикот завршува со порака на единство и вечност: „Македонија – вечна од исконот до бескрајот. Господ со Македонците!“
