Целите на Европската унија за намалување на емисиите на CO2 од возилата, вклучувајќи 100% намалување за автомобили до 2035 година, повеќе не се остварливи, порачаа во средата челниците на европските здруженија на производители на автомобили и добавувачи на автомобилската индустрија. Претседателката на Европската комисија, Урсула фон дер Лајен, ќе ги прими на 12 септември челниците на автомобилскиот сектор за да разговараат за иднината во која се соочуваат со двојни закани – кинеска конкуренција во електричните возила и американски тарифи.
Во писмото до фон дер Лајен, извршниот директор на Мерцедес, Ола Келенус, и Матijas Цинк, извршен директор за погонски склопови и шасија во Шефлер АГ, истакнаа дека европските производители се посветени на постигнување на целта на ЕУ за нето нулта емисија до 2050 година. Меѓутоа, нагласиле дека производителите од ЕУ сега се соочуваат со речиси целосна зависност од Азија кога станува збор за батерии, како и со нееднаква инфраструктура за полнење, повисоки трошоци за производство и американски тарифи.
„Остварување на строгите цели за CO2 за автомобили и комбиња за 2030 и 2035 година во денешниот свет едноставно повеќе не е изводливо“, наведоа во писмото. Тие додадоа дека законските обврски и казни не би поттикнале транзиција. „Електричните возила ќе предводат, но мора да постои и простор за (plug-in) хибриди, продолжувачи на домет, високо ефикасни возила со мотори со внатрешно согорување, водород и декарбонизирани горива“, се вели во писмото.
Двајцата челници на здруженијата истакнаа дека регулативите за CO2 за тешки камиони и автобуси исто така мора да се преиспитаат. Во март, Комисијата се согласи да им даде на производителите на автомобили дополнително време за исполнување на целите за намалување на емисиите на CO2 кои првично беа поставени за 2025 година.
