По инцидентот во Штип, кој предизвика бурни реакции, се огласија и од редовите на ФК Шкупи. Во своето соопштение, клубот изрази загриженост за начинот на кој медиумите ја пренесуваат ситуацијата, нагласувајќи дека родителите реагирале со цел да ги заштитат своите деца. “Ние како клуб сме длабоко загрижени од клеветите и неточните прикажувања што некои медиуми во Македонија ги прават во врска со нашиот клуб и, пред сè, со нашите деца,” се вели во соопштението.
ФК Шкупи истакна дека осудува секое насилство и дека фудбалот не смее да биде место за такви дејствија. “Насилството е надвор од фудбалот. Нашиот клуб со години е посветен на спортското и општественото воспитување на децата. Во соработка со тренерите и родителите организираме предавања речиси секој месец за фер-плеј однесување, почитување и коректност – суштински принципи за развојот на нашите деца,” додаваат од клубот.
Според нив, интервенцијата на родителите била исклучиво за да се спречи ескалација на ситуацијата. “Не постоела никаква друга позадина. Со ФК Брегалница имаме многу добри односи и се надеваме дека овој инцидент никогаш повеќе нема да се повтори,” изјавија од Шкупи.
И покрај обидите да се објасни ситуацијата, инцидентот остави сериозни последици, при што две деца од Брегалница се здобиле со повреди, вклучувајќи скршеница на ногата и повреди на главата. Фудбалската Федерација на Македонија веќе отвори дисциплинска постапка против клубот, а од МВР најавија дека ќе бидат поднесени кривични пријави. Ваквите настани само потврдуваат дека фудбалот треба да остане игра и радост за децата, а не место за насилство.
