Во време на еколошки катастрофи и пожари, СДСМ ја критикува власта на ВМРО-ДПМНЕ за непостапување и манипулации. Според портпаролката на СДСМ, Богданка Кузеска, 400 пожарникари, ангажирани преку општините со ветување за месечен надоместок од 24.000 денари, сè уште не добиле ниту една плата од моментот на нивното вработување во август до 17 септември.
Кузеска истакна дека информациите добиени од извори во општините укажуваат на тоа дека исплатата е блокирана поради изборите, бидејќи се смета за “вонредно плаќање”. “Јавно го прашуваме премиерот Мицкоски дали е ова точно? Ако се потврди, ова значи дека владата на ВМРО-ДПМНЕ свесно ги излажала граѓаните и овие млади луѓе, искористувајќи ги за политичка реклама, а потоа ги оставила без денар,” рече Кузеска.
Таа нагласи дека во услови на пожари, оваа власт не само што не успева да обезбеди потребна заштита, туку и дополнително ја загрозува безбедноста на граѓаните. “Со вакви лаги и манипулации, нема да го зајакнете системот за заштита и спасување – само ја губите довербата на граѓаните и ја уништувате безбедноста на државата,” додаде Кузеска.
