Во текот на оваа година, Европската унија забележа пораст од 39 нови милијардери, а вкупното богатство на овие супербогати поединци се зголеми за над 400 милијарди евра, според извештајот на невладината организација Оксфам. Ова значи дека во просек, во ЕУ се појавува нов милијардер на секои девет дена, а нивното богатство секој ден во првата половина на годината се зголемуваше за повеќе од две милијарди евра.
Во моментот, Европската унија брои 487 милијардери, чие вкупно богатство достигна 2,3 трилиони евра до крајот на јуни, со пораст од 405 милијарди евра. Најбогатите 3.600 луѓе во Европа поседуваат богатство кое е еднакво на богатството на 181 милион наjsиромашни, што е приближно колку населението на Германија, Италија и Шпанија заедно. Извештајот истакнува дека даночните политики низ континентот значително им помогнале на овие супербогати да го задржат и зголемат своето богатство.
Кијара Путатуро, авторка на извештајот, изјави за Politico дека постои директна врска помеѓу даночниот систем и нееднаквоста во богатството. Според неа, даночниот систем во ЕУ е дизајниран така што најголемиот дел од приходите доаѓаат од обичните граѓани, при што осум од десет евра од даночните приходи доаѓаат од данок на додадена вредност и данок на доход. Само девет проценти од вкупните даночни приходи во земјите на ЕУ доаѓаат од компании, а само 0,4 проценти од данок на богатство.
Оксфам истакнува дека просечните плати се опорезуваат по повисоки стапки, додека инвестициите и хедге фондовите се опорезуваат по пониски стапки, што дополнително ги збогатува богатите. Поради недостаток на данок на наследство во десет земји од ЕУ, а само во Шпанија постои данок на нето богатство, супербогатите често плаќаат многу пониски ефективни даночни стапки на своите приходи и богатство во споредба со обичните луѓе.
Оксфам предупредува дека новото богатство главно завршува во приватни џебови, а не во јавните буџети, што резултира со тоа дека европските влади стануваат релативно посиромашни. Според проценките, ако владите задржеле исто толку богатство како во 1990-те години, сега би имале дополнителни 3,6 трилиони евра за инвестиции во јавни услуги, училишта и болници.
Извештајот на Оксфам, наречен “Европска агенда за опорезување на супербогатите”, е објавен пред состанокот на европските министри за финансии, каде што ќе се дискутираат начини за финансирање на буџетот на ЕУ. Оксфам предлага Европската комисија да изработи план за опорезување на богатите лица преку зголемување на транспарентноста преку европски регистар на имот. Комисијата исто така треба да се обиде да воспостави заеднички стандарди за данок на капитална добивка, на пример, колку би требало да плати поединецот при продажба на акции.
