Неделава што измина, на 4 мај, во Тринген, во организација на Македонскиот национален совет во Швајцарија, се одржа семакедонска конференција на која присуствуваа претставници од најголемиот број македонски здруженија во Швајцарија.
На семакедонската конференција учествуваа повеќе од 140 претставници од 40 здруженија, клубови, асоцијации, македонски училишта, како и трите македонски православни црковни општини во Швајцарија.
Семакедонската конференција беше одржана со цел меѓусебна соработка, координација и размена на искуства и информации.
Присутните укажаа на можностите за соработка помеѓу здруженијата, имајќи предвид дека беа поделени во две македонски заедници, а беа иницирани повеќе предлози за реализирање на заеднички проекти и договор за заедничка годишна програма со датуми, настани и личности, основање на Солидарен фонд за Македонија, решавање на проблемот со Македонската амбасада во Берн и петицијата иницирана од Македонскиот национален совет на Швајцарија за поголема соработка со македонските и со швајцарските институции на власта.
Претседателството на Македонскиот нациоанлен совет во Швајцарија во состав Илчо Китанов, Гонца Перунковска и Гордана Ѓуриќ го презентираа предлог Статутот за работа на Македонскиот национален совет во Швајцарија, а поднесоа извештај за досегашната работа и предлог програма за работа во идната година.
На семакедонската конференција присуствуваа директорот на Агенцијата за иселеништво Горан Ангелов и Билјана Костова, како и претставниците на Министерството за надворешни работи на Македонија Боро Мирчески и Мелехат Муфтароска, кои ја претставија државната стратегија за иселеништвото, со предлог до здруженијата доколку се заинтересирани – активно да учествуваат во нејзината изработка.
Претставниците на присутните здруженија го прифатија предлогот оваа семакедонска конференција да прерасне во традиционална и да се одржува еднаш годишно.
