Еден познат јутјубер-авантурист, кој стои зад каналот Camperghini, предизвика големо внимание со своето најново видео од Македонија. Конор, човекот кој одлучил целосно да го смени животот – да си даде отказ, да ја продаде куќата и да купи Lamborghini Urus што го претвори во уникатен камп-возилo – пристигна во земјава во рамки на неговата мисија да ги посети сите земји во светот.
Во видеото, снимано низ повеќе локации во Северна Македонија, тој раскажува како по преминувањето на границата морал да земе осигурување, имал расправија со таксист, се обидувал да најде место за туширање, а на крајот сосема неочекувано добил шише ракија од локален жител на автомобилски собир. Како што вели самиот Конор, патувањето било комбинација од хаос, случајни добри дела и „чиста балканска енергија“.
Неговиот необичен начин на живот и одлуката да ја напушти рутината привлекоа илјадници следбеници на социјалните мрежи, каде секојдневно објавува видеа и фотографии од своите патувања. Според него, целта е едноставна – да ја почувствува секоја земја одблизу, зад воланот на неговиот препознатлив Urus-кампер и во директен контакт со луѓето што ги среќава по пат.
Со Македонија, вели тој, ќе го памети токму тоа: спонтаноста, гостопримството и незаборавните моменти што само патувањата можат да ги донесат.
