Граѓанската Опција за Македонија (ГРОМ), предводена од Стевче Јакимовски, кандидат за градоначалник на општина Карпош, денеска изрази остар протест против неодамнешните настани во скопската населба Злокуќани. Според партијата, високи претставници на власта се обвинети за делење вреќи брашно, што тие го сметаат за форма на предизборен поткуп. „Денес сведочевме на слика која нè враќа триесет години наназад. Наместо со идеи, визија и програма, власта на терен излезе со вреќи брашно“, изјавија од ГРОМ.
ГРОМ тврди дека граѓаните на Карпош биле сведоци на делење вреќи од по 30 килограми брашно од гаражи и куќи, што партијата го оценува како навреда за достоинството на секој поединец. „Кога нема резултати, кога нема дела – останува само брашното“, порачуваат од ГРОМ, нагласувајќи дека оваа постапка е јасен показател за вистинското лице на власта и нејзиниот кандидат.
Партијата упати и провокативно прашање до премиерот: „Дали ова е вашата програма за инженерите, професорите, лекарите, пензионерите и домаќините? Дали мислите дека достоинството на човекот вреди една вреќа брашно?“
ГРОМ истакна дека во Карпош граѓаните не се купуваат, туку се почитуваат. „Ние не делиме брашно – ние градиме водоводи, канализации, улици, фасади, училишта и градинки. Карпош одамна ја надмина вашата ’триесеткилна политика‘“, завршуваат од партијата.
