Скопската депонија „Дрисла“ се наоѓа во исклучително лоша состојба, а градоначалникот на Град Скопје, Орце Ѓорѓиевски, најави силни напори за нејзина трансформација во современ регионален центар за обработка и третман на отпадот, слично на оние во Европа. Во своето обраќање на експертската работилница за создавање зелени работни места во Македонија, Ѓорѓиевски истакна дека е неопходно да се залагаме за селектирање на отпадот и негово поефикасно искористување како суровина.
„На самиот почеток на мојот мандат максимално се посветив на средување на состојбата со нередот и ѓубрето во главниот град, нешто што беше проблем многу години наназад“, рече Ѓорѓиевски. Тој е уверен дека Скопје, во соработка со Владата, ќе успее да се справи со проблемот со отпадот на многу подобар начин.
Градоначалникот ја нагласи важноста на невладините организации во собирањето, селектирањето и третманот на отпадот. „Како пример ќе го истакнам поставувањето на специјалните контејнери за одделно собирање стаклен отпад, пластика, хартија и слично“, додаде тој. Искуството со поставување машини за рециклирање пластични шишиња во основните училишта, како и иницијативата за плаќање паркинг со собирање шишиња, се само некои од иновациите кои може да се применат.
„Денешното јавно обраќање беше прво по моето стапување на функцијата скопски градоначалник“, напомена Ѓорѓиевски, изразувајќи надеж дека дел од искуствата на австриските експерти ќе бидат пренесени во Скопје. Работилницата „Креирање зелени работни места во Северна Македонија“ е организирана од Австриското министерство за работа и Австриската амбасада во Скопје.
