Сообраќајот на државните патишта утринава се одвива непречено и по суви коловози, информира Авто мото сојузот на Македонија во редовниот извештај за состојбата на патиштата на 13 март 2026 година во 06:30 часот.
Интензитетот на сообраќајот надвор од градските средини е умерен, а на граничните премини од македонска страна нема подолги задржувања за влез и излез од државата.
Денес, во периодот од 09:00 до 12:00 часот, ќе се врши испитување на мостот на реката Вардар кај селото Здуње, на државниот пат А2 Гостивар – Кичево.
Поради активностите, сообраќајот ќе се одвива според времен режим на сообраќај, при што се можни и кратки прекини во сообраќајот.
Од 15 ноември 2025 година е во сила законската обврска за задолжително поседување зимска опрема во возилата, без оглед на моменталните временски услови.
Оваа обврска ќе важи до 15 март 2026 година.
Од АМСМ апелираат возачите да се движат со прилагодена брзина и зголемено внимание, особено на патните правци каде постои можност од појава на одрони.
Внимателно возење се препорачува на следните делници:
- Катланово – Велес
- Маврово – Дебар – Струга
- Виница – Берово
- Кочани – Делчево
Патниот правец Охрид – Ресен преку Националниот парк Галичица е затворен за сообраќај за сите видови возила.
Овој сезонски режим важи во периодот од 21 ноември 2025 до 31 март 2026 година.
На неколку делници во државата се изведуваат градежни работи и има изменет режим на сообраќај.
Од 13 март 2026 година започнуваат активности за изведба на премин на интерконективен гасовод под автопатот А1 „Пријателство“, на делницата Смоквица – Гевгелија. Поставена е соодветна сигнализација за времен режим на сообраќај.
На државниот пат А2 – скопска обиколница се врши рехабилитација на делница од 250 метри, од клучка Волково до клучка Кондово.
Затворена е левата лента за претекнување, а сообраќајот се одвива по средната и десната лента.
Поради градежни активности поврзани со Коридорот 10Д, сообраќајот на делницата Прилеп – Битола е пренасочен по регионалниот пат Р1101.
Движењето на возилата се пренасочува од клучка Лагово до Тополчани.
На регионалниот пат Р1202 Косоврасти – Мелнички Мост се врши санација на свлечиште, поради што е воведен времен режим на сообраќај.
На мостот кај Здуње, на делницата Гостивар – Стража, во тек се градежни активности со времена семафоризација и наизменично пропуштање на возилата.
