Градоначалникот на Општина Кочани, Владко Грозданов, вчера оствари средба со амбасадорката на Кралството Холандија, Узлем Џанел.
На средбата се разговараше за актуелната состојба во Кочани, со посебен осврт на предизвиците во периодот на закрепнување, како и за можните облици на понатамошна поддршка и продлабочување на соработката меѓу Општината и холандските партнери.
Амбасадорката Џанел истакна дека Кочани и регионот се препознатливи по присуството на холандски инвеститори, кои во наредниот период ќе настојуваат, покрај економската активност, да понудат и конкретни социјални мерки. Тие мерки ќе бидат насочени кон интеграција на повредените лица во стопанскиот сектор, преку создавање можности за вработување, преквалификација и долгорочна економска стабилност.
Градоначалникот Грозданов се заблагодари за континуираната поддршка од Холандија и за подготвеноста за размена на искуства во справувањето со последици од трагедии.
Од двете страни беше изразена подготвеност за понатамошна соработка, особено во делот на економски развој, социјална инклузија и унапредување на безбедносните стандарди, со цел Кочани да изгради поотпорна и посигурна иднина за своите граѓани.
Извор:kocani.gov.mk
