Во Штип пет ученици завршија на лекување во Клиничката болница откако консумирале сендвичи од локална сендвичара во близина на нивното училиште. Настанот предизвика сериозна загриженост кај родителите и јавноста за безбедноста на храната што се продава во градот.
Мајка на едно од децата, која сакаше да остане анонимна, изјави дека симптомите на труење се појавиле неколку часа по оброкот. Таа посочи дека сомнежите се насочени кон квалитетот на месото и компирите во сендвичите. „Апелирам храната што е оставена по магацините да се контролира и да се продава хигиенски исправна,“ изјави таа, барајќи почести и построги контроли на угостителските објекти.
По пријавата од Центарот за јавно здравје, инспектори на Агенцијата за храна и ветеринарство (АХВ) извршија вонреден надзор во сендвичарата. Земени се примероци од храната за лабораториски анализи, како и брисеви од работните површини. До добивањето на резултатите, објектот е времено затворен.
Иако сите ученици се стабилизирани и пуштени на домашно лекување, случајот отвори сериозни прашања околу хигиената и контролата на храната во угостителските објекти во Штип.
