Светски Македонски Конгрес ги оцени како неприфатливи одлуките на Владата за издавање дозволи за престој и работа на странски државјани, оценувајќи дека со нив се врши промена на етничката и верската структура на државата, како и нарушување на темелните принципи на државноста.
Во реакцијата објавена на 19 јануари 2026 година во Скопје, од Конгресот наведуваат дека ваквите политики се спротивни на унитарниот карактер на државата и на принципот на неменливост на етничката и верската карта, утврдени по 2001 година.
СМК смета дека увозот на работна сила не претставува економска нужност, туку директно го поткопува домашниот пазар на труд и животниот стандард на македонските државјани. Посебно се критикува одлуката за издавање 10.000 дозволи за престој и работа во 2026 година, од кои 9.750 за редовно вработување, 200 за упатени странци и 50 за сезонски ангажмани.
Според податоците наведени во соопштението, 4.500 дозволи се предвидени за нови вработувања, додека 5.250 се за продолжување на постојните дозволи, најчесто во градежништвото (Коридорите 8 и 10Д), индустријата, угостителството и трговијата. СМК укажува дека ваквите бројки се особено проблематични ако се земе предвид дека во државата има околу 90.000 невработени македонски државјани.
Конгресот дополнително посочува дека бројот на дозволи во 2026 година е три и пол пати поголем во споредба со 2021 година, кога биле издадени само 1.704 дозволи. Како земји од кои има најголем интерес за работа во Македонија се наведуваат Бангладеш, Непал, Индија, Турција, Кина и Филипини.
Иако Владата секоја година утврдува квота која не смее да надмине 5 проценти од вкупно вработеното население, СМК оценува дека бројката од 10.000 дозволи претставува значителен раст – за околу 7.000 повеќе во однос на 2023 година.
Во соопштението се предупредува дека ваквата политика ќе доведе до притисок врз минималната плата, во корист на профитните интереси на големите компании, со што Македонија ризикува да се претвори во резерват на евтина работна сила и прифатен центар за туѓи социјални проблеми.
СМК изразува и посебна загриженост поради, како што наведуваат, бришењето на невработени македонски државјани од евиденцијата на Агенцијата за вработување, што, според нив, се прави за да се отвори простор за увоз на странска работна сила.
