Истанбул, 10 април 2025 (МИА) – Турскиот министер за трговија, Јомер Болат, денеска изјави дека Турција има за цел да достигне трговска размена со САД во вредност од 100 милијарди долари.
На прес-конференција во Истанбул, Болат коментираше дека и покрај актуелната неизвесност предизвикана од новите царини воведени од американскиот претседател Доналд Трамп, Турција гледа шанса да ги зголеми извозните можности.
– Нашата прва задача е да излеземе неоштетени од ситуацијата, а втората е да ги искористиме новите можности, изјави Болат.
Според него, Турција продолжува со решителни чекори во надворешната трговија, со цел отворање кон нови пазари и зголемување на извозот.
Трговската размена помеѓу Турција и САД во 2024 година пораснала за 4,7 отсто, достигнувајќи 35,2 милијарди долари, покажуваат податоците на турското Министерство за трговија.
Новите американски царини за Кина и ЕУ се оценети како можност од турскиот бизнис сектор, бидејќи Турција останува со пониски стапки за извоз во САД.
Од Сања Костовска Извор МИА
