Швајцарската фармацевтска компанија „Ронтис“ ќе инвестира десетици милиони евра во Македонија, што ќе овозможи отворање на над 500 нови, добро платени работни места. Ова денеска го најави премиерот Христијан Мицкоски за време на увидот во градежните активности на нова детска градинка во скопската населба Инџиково, во Општина Гази Баба.
На новинарско прашање за привлекувањето странски инвестиции, Мицкоски истакна дека тие се еден од клучните приоритети на Владата.
„Инвестициите и отворањето нови работни места се врвен приоритет на оваа Влада. Имаме потврда од швајцарската компанија ‘Ронтис’ дека ќе инвестира неколку десетици милиони евра, што ќе значи преку 500 нови вработувања со солидна плата. Ова е само една од добрите вести кои ги објавуваме за македонските граѓани,“ изјави премиерот.
Компанијата „Ронтис“ е позната по развојот и производството на медицински и фармацевтски производи, а инвестицијата се очекува да придонесе за економскиот раст и индустрискиот развој на земјата.
