Москва, 2 април 2025 (МИА) – Две лица се полесно повредени во напад на украински беспилотни летала во текот на ноќта во Таганрог во руската област Ростов, а пожар избувнал во една станбена зграда, изјави вршителот на должноста гувернер Јуриј Сљусар.
Според него, пожарите биле брзо изгаснати.
Претходно беше соопштено дека во нападот биле оштетени две станбени згради, а 85 лица биле евакуирани. Во Таганрог е прогласена вонредна состојба.
Во нападот на украинските дронови на Курск, оштетена е станбена зграда во центарот на градот, а жрти нема, објави на Телеграм в.д. гувернерот Александар Хиштајн.
Тој додаде дека делови од авионот и неговиот мотор паднале на покривот на повеќекатна зграда и дека е донесена одлука да се евакуираат 60-те жители на зградата додека работат службите за итни случаи.
Руските сили за воздушна одбрана уништија 93 украински беспилотни летала во три региони во текот на ноќта, соопшти руското Министерство за одбрана.
Беше прецизирано дека 87 од нив биле соборени во областа Курск.
Во соопштението се наведува и дека уште четири беспилотни летала се елиминирани во Ростов, а два во Белгород.
Од Пандорка Арсовска-Гацова Извор МИА
