Сообраќајот на државните патишта утрово се одвива во зимски услови, по претежно влажни коловози. На одредени повисоки места во западните и југозападните делови од земјата има мали остатоци од кашест снег, кои се резултат на ноќните врнежи, но состојбата е стабилизирана по интервенциите на дежурните екипи на ЈП „Македонијапат“.
Од АМСМ потсетуваат дека од 15 ноември е во сила законската обврска за задолжително поседување зимска опрема во сите возила, без оглед на моменталните временски услови, и дека таа ќе важи до 15 март 2026 година. Интензитетот на сообраќај надвор од градските средини е умерен, а на граничните премини од македонска страна засега нема подолги задржувања за влез и излез од државата.
На возачите им се препорачува зголемена внимателност и прилагодување на брзината, особено на патиштата што минуваат низ котлини, речни долини и клисури, каде што постои можност од појава на одрони. Посебен апел за внимателно управување важи за делниците Катланово–Велес, Маврово–Дебар–Струга, Виница–Берово и Кочани–Делчево.
Во меѓувреме, сезонски е затворен патниот правец Охрид–Ресен преку Националниот парк Галичица, кој нема да биде прооден за сите видови возила до 31 март 2026 година. Поради тековни градежни активности, на повеќе патни правци е воведен изменет режим на сообраќај, со пренасочување, временска сигнализација или наизменично пропуштање на возилата, па од АМСМ апелираат возачите да ја почитуваат поставената сообраќајна сигнализација и навремено да се информираат за состојбата на патиштата.
