Екипата на Вардар не успеа да ја забележи третата победа во 3. коло од Прва МФЛ, откако вечерва на арената „Тодор Проески“ во Скопје одигра 2:2 против тимот на АП Брера.
Струмичани во главниот град дојдоа по поволен резултат и успеаја да го остварат. Двапати водеа и на крајот стигнаа до првиот бод сезонава. Вардар, пак, мораше да се задоволи само со реми по двете победи над Пелистер и Тиквеш во првите две кола.
По само 15. минути игра, Брера успеа да поведе со голот на Ндзенгуе, кој искористи невнимание на одбраната на Вардар. Интернационалецот од Габон излезе сам пред Талески и умешно го лобуваше домашниот голман.
Сепак, само четири минути подоцна, Роџерс Мато погоди во гостинската мрежа за израмнување на 1:1.
На полувреме, сепак, Брера замина со водство. Зоран Ивановски одлично продре по десната страна, истрча околу четириесетина метри, излезе сам пред Талески, а потоа прецизно погоди за 1:2.
Во вториот дел Вардар целосно доминираше и имаше огромен посед на топката. Создаде неколку ситуации, а на крајот во 88. минута, по една интервенција на Вргов со глава надвор од шеснаесетникот, топката стигна до Мато на околу четириесет метри од голот. Тој мајсторски, со прекрасен удар, го погоди празниот гол на Брера за конечни 2:2.
Извор/Фото:www.ffm.mk
