Сообраќајот на државните патишта утринава се одвива непречено, по претежно суви коловози, информираат надлежните служби во најновиот билтен за состојбата на патиштата.
Интензитетот на сообраќај надвор од градските средини е умерен, а на граничните премини од македонска страна засега нема подолги задржувања за влез и излез од државата.
Од АМСМ потсетуваат дека зимската опрема е задолжителна за сите возила од 15 ноември 2025 до 15 март 2026 година, без разлика на актуелните временски услови, и апелираат возачите да ја почитуваат оваа законска обврска.
И покрај поволните услови, возачите се повикуваат на зголемена внимателност, особено на патиштата кои минуваат низ клисури, котлини и речни долини, каде постои ризик од појава на одрони. Како покритични делници се издвојуваат правците Катланово – Велес, Маврово – Дебар – Струга, Виница – Берово и Кочани – Делчево.
Поради сезонски режим, патниот правец Охрид – Ресен преку Националниот парк Галичица останува затворен за сообраќај за сите видови возила до 31 март 2026 година.
Измени поради градежни активности
Повеќе делници низ државата и натаму се под времен режим на сообраќај поради тековни градежни работи:
- На Коридор 10, на делницата Прилеп – Битола, сообраќајот е пренасочен по регионалниот пат Р1101.
- На скопската обиколница (државен пат А2), во делот од клучка Волково до клучка Кондово, се врши рехабилитација на коловозот, при што е затворена левата лента за претекнување.
- На експресниот пат Крива Паланка – Страцин, кај село Петралица, сообраќајот се одвива со рачна регулација во текот на денот, а во вечерните часови со семафорска сигнализација.
- Поради санација на свлечиште, воведена е привремена измена на режимот на сообраќај на регионалниот пат Косоврасти – Мелнички Мост.
- На делницата Гостивар – Стража, кај мостот Здуње, сообраќајот се одвива наизменично со семафори поради градежни зафати, кои ќе траат повеќе месеци.
Надлежните апелираат до учесниците во сообраќајот да ги почитуваат поставената сигнализација и привремените режими, со цел поголема безбедност и избегнување на застои.
