Денеска во Штип се одржа првиот информативен состанок за подготовките на годинешната „Пастрмајлијада 2025“. Овој состанок беше организиран со цел да се информираат угостителите кои сакаат да учествуваат во манифестацијата. Учесниците имаа можност да се запознаат со условите и правилата за учество, логистиката и поставувањето на штандовите, како и со роковите за пријавување и програмата на настанот.
„Пастрмајлијада“ станува сè попопуларна од година на година, а организаторите очекуваат дека оваа година ќе биде уште подобра од претходната, со нови активности и изненадувања. На денешниот состанок, угостителите разговараа со организаторите, што ќе овозможи подобра координација и подготовка за настанот, кој е закажан за следниот месец.
Како и секоја година, организаторите најавуваат дека ќе бидат добри домакини и ќе ги пречекаат гостите од Македонија и странство на соодветен начин. „Пастрмајлијада 2025“ е предвидена за 20 септември и се очекува да биде голем настан за сите љубители на вкусната храна и традицијата. Посетителите ќе имаат можност да уживаат во вкусните специјалитети, а истовремено и во музиката на познатите македонски изведувачи Владо Јаневски, Елена Ристеска и балканската ѕвезда Дино Мерлин.
