Четврто Европско првенство во низа за машката сениорска репрезентација на Македонија! Континуитетот на континенталните натпреварувања националниот тим го обезбеди во последното коло од квалификациите за ЕвроВолеј 2026, синоќа, со победата од 3:0 (25:13, 25:16, 25:17) над Грузија во одлична атмосфера во СЦ „Борис Трајковски“ во Скопје.
Македонија поради подобриот поен количник ги остави зад себе Австрија и Норвешка и како една од петте најдобро второпласирани репрезентации во групите се најде на Европското првенство следната година.
Во клучниот натпревар синоќа со поддршката од своите навивачи македонските одбојкари покажаа карактер, квалитет и голема желба да го продолжат успехот на оваа генерација, која испишува нова страница од репрезентативната историја.
Капитенот Никола Ѓоргиев го предводеше тимот со 17 поени, Филип Савовски постигна девет, додека Александар Љафтов и Владо Милев реализираа по осум поени.
Министерството за спорт ќе го награди националниот тим со три милиони денари за пласманот на Европското првенство 2026, со кое македонската одбојка го задржува своето место на европската мапа.
Македонија претходно настапуваше и на ЕП во 2019, 2021 и 2023 кога го постигна и најголемиот успех со пласманот во осминафиналето.
Пласман на ЕП 2026 по комплетирањето на квалификациите обезбедија Данска, Белгија, Чешка, Естонија, Швајцарија, Грција и Словачка како првопласирани во групите, додека Македонија, Летонија, Турција, Израел и Шведска се петте најдобри второпласирани селекции.
Европското првенство ќе се одржи од 9 до 27 септември 2026 година во Италија, Финска, Бугарија и Романија.
Извор:vfmkd.org.mk
