Федерико Бернардески, по враќањето во Италија, реши да се ослободи од стереотипите и да зборува за еден од најголемите проблеми во фудбалот – хомофобијата. Поранешниот играч на Фиорентина, Јувентус и Торонто, а сега нов член на Болоња, беше гостин во популарната емисија БСМТ, каде што се потсети на тешките моменти од својата младост, кога поради својот стил на облекување бил етикетиран како геј и подложен на напади.
„Пред 12 години носев здолниште. Па што? Ако ми се допаѓа, ќе го носам. Почнаа да зборуваат дека сум геј. Ако и сум, каква врска има тоа? Зар не го кажувам? Всушност, би бил горд. Симнувам капа на оние кои ги ослободуваат своите вистински чувства“, изјави Бернардески, поранешниот репрезентативец на Италија. Тој не крие дека таквите коментари длабоко го погодиле на почетокот на неговата кариера. „Во тоа време имав 20 години. Читањето на тие зборови ме повредуваше, страдав“.
Бернардески испрати важна порака до младите кои се соочуваат со осуди поради својата различитост: „Мислам дека сите треба да се прашаме, дали е навистина толку важно што другите мислат за нас? Зошто да бидеме затвореници на туѓи мислења?“
По својата авантура во МЛС со Торонто, Бернардески се врати во Италија и потпиша за Болоња, каде се обидува да ја оживее својата кариера. „Сретнав прекрасна група луѓе со важни вредности. Водени се од ветерани кои поминале низ тешки сезони и знаат што значи заедништвото“. Досега во оваа сезона, Бернардески одигра пет натпревари (207 минути) во Серија А, но не постигна гол ниту асистенција.
